مين فينا ما سمعش عن الأسافين ؟؟؟؟ مين فينا ما عمروش انطقع أسفين طلع من راسه؟؟؟؟ طيب عمرك فكرت شو معنى الأسفين ..الاسفين باختصار: هو ضحك بالوجه ومن وراك بيحكي عنك للمسؤول بكلام صحيح اوكذب وانت بتضحك وبتلعب ومش عارف شو بيصير ورى ظهرك....
وشو أنواع الأسافين ؟؟؟؟
للأسافين أنواع عدة نذكر اشهرها – حاول تراجع الاسافين اللي أكلتها بحياتك واللي انت ضربتها وشوف بتنتمي لأي نوع
1. الاسفين الموجه ويتكون هذا الاسفين من رأس احادي يكون موجه اليك مباشرة من عدو لك بالشغل متربص بيك ومستني الفرصه وانت من شطارتك اعطيته الفرصة ففقعك اسفين محترم
…
2. الاسفين الجماعي او – ملتي اسفين - وهذا من اقوى الاسافين ويكون مفعوله شديد ويكون مجموعه من الموظفين بيضربوا موظف واحد... اسفين من الاخر عند المدير... وطبعا لانهم جماعه المدير راح يعتبر انهم صح وانت غلط.
4. اسفين متعدد الاتجاه او ملتي دايركت اسفين وهذا اسفين بتضربه عند مديرك وانت قاصد فيه- والنيه بالقلب - شخص معين وانه لايحافظ على مصلحة الشغل وانه ضد مبادئ الإدارة وبالجملة تلطشلك خمس ست موظفين بالمعيه مش عاجبينك ...وشايف انهم ممكن يضروك وهذا يعتبر من اذكى الاسافين لانك ضربت عشر اسافين بحجر واحد.
5. اسفين الرحمةوهو اسفين نادر تطلقه بحالة تشوف صاحبك تعبان من الشغل ومش عاجبته الشركة والموظفين بيعطوه شغل كتيير فوق طاقته والاخ ممكن من الضغط يروح فيها --- فبتروح عند المدير وبتلعن سنتفيت صاحبك وبتظلك توز عليه حتى يقوم المدير ويقدم فيه عريضة ويكحشه وهيك تكون انت اطلقت عليه رصاصة الرحمة وخليته يقعد بالبيت معزز مكرم.
6.ان دايركت اسفين:وهو من اقل الاسافين فاعليه يصدر من واحد قرفان زهقان عنده مبدأ علي وعلى أعدائي وبروح على المدير وبدال صباح الخير بقلله انت لو بتضب موظفينك بدل مانك قاعد ورى الكرسي ولك شوف شو عم يصير وبتصير تسلخ شمال يمين وانت مو عارف ليش او مين بس كل هدفك تفش غلك وطبعا ما تتوقع الشباب حيسيبوك بعدها لانك لكشت الكل وما الك صاحب.
7. ريفيرس اسفينوهو من اغبى الاسافين يصدر من انسان غبي تافه معوق طافي رايح يدق صاحبه اسفين بلاقي حاله انه داق بحاله اسفين مثلا- ترى خالد طول نهارو بدخن بالشركة (وطبعا الدخان بالشركة ممنوع) والمشكلة إنو دايما يتسلبط علي وبيدخن من بكيتي
...
8.اسفين طويل المدى وهذا الإسفين لا يطلقه الا الخبثاء وهو على دفعات وقليل الجرعه بتضللك تزت اسافين صغيرة ومع الوقت بتتجمع عند مديرك انه فلان الفلاني عليه مشاكل كثيرة ولازم نأدبه وهيك انت بتكون كانك ما عملت اشي – تراكمات يعني- وهادا اسفين مضمون النجاح وقد اثبت فاعليته عند الشباب الطيبة
.
9. اسفين موجه بالاقمار الصناعيهوهذا الاسفين ما اله علاج ولامضاد حيوي لانه اسفين من شخص واصل من فوق فالافضل توخد حذرك من هيك اشخاص عشان تضمن حياة سعيده هانئة بشركتك
.
ومثل ما احنا شايفين تختلف الاسافين بنوعها وتأثيرها- بس من خبرتي انه راح يجي يوم اسود عليك تنردللك كل اسافينك ووقتها حتبكي دم على اسافينك القديمة ولو سألتني بحكم خبرتي البسيطة بالاردن وبشركاتها شو علاج الاسافين فالعلاج هو الاتي
:
1- عليك بتناول الكثير من فيتامين الوقاية فيتامين واو (الواسطة) لانها تشكل جهاز ردع ضد المأسفينين.
2- عليك بالاكثار من الحذر والخبث والتحفظ .. ممكن ذلك يخفف فقط ولو انه البعض يشكك في ذلك ويقول : وداوها باللتي هي الداء...يعني اسفن فيه الصبح قبل ما يأسفن فيك المساء
3- امشي الحيط الحيط ودايما احكي حاضر ....ولا تحكي لأ...ومع ذلك برضه حتتأسفن مش بكيفك مكتوب عليك الاسفنة خاوا.
4- كل يوم صبح على مديرك واساله : اه شو الاخبار انشا الله ما في اولاد حلال حكولك شو حكينا عنك امبارح....؟؟؟؟؟؟!!!
